Óscar Ibáñez (Pontevedra, 1976) centrará a súa charla-concerto na gaita galega e, especialmente, nos temas que conforman o seu recente disco "Alén do Mar". Trátase do seu primeiro traballo discográfico en solitario. Neste disco, o gaiteiro e frautista pontevedrés invítanos a unha viaxe sonora que discorre polo Atlántico cheo de orixinalidade, imaxinación e creatividade, a través dunha magnífica selección de melodías galegas latinoamericanas enriquecidas con elementos propios da música celta.

Óscar Ibáñez mestura muiñeiras ancestrais recollidas polo gaiteiro boticario Perfecto Feijóo, composicións celtas do virtuoso violinista Manuel Quiroga, ou un tema dedicado ao pirata da Moureira, Benito Soto, co arin-arin, un xénero que se xerou no Camiño de Santiago Norte ou Camiño da Costa ao seu paso por Euskadi, o flamenco e outras músicas denominadas de ida e volta como a habanera, o choro, o vals venezolano ou o tango, que encontrou noutra ribera.

Este colorido e enérxico traballo de Óscar Ibáñez aposta polo irmandamento de culturas e reflicte as influencias recibidas por este mestre gaiteiro ao longo dos últimos quince anos da súa carreira, desenvolvida en máis de trinta países de Europa. No disco, Ibáñez conta coa colaboración da súa banda "Tribo" e inclúe colaboracións de artistas de renome de Galicia, Navarra, Irlanda, Cuba, Arxentina, Venezuela, País Vasco, Andalucía ou Brasil.

Óscar Ibáñez, experto, docente e profesional da gaita galega e a súa tradición, iniciou andadura co grupo "Treboada" e desde 1995 dirixe o "Grupo de Música Tradicional Pai da Cana". Os seus contactos con gaiteiros do Arco Atlántico desenvólvense en diversos concursos internacionais como o Macallan-McCrimmon de Lorient e realiza diversos talleres musicais para o mundo da emigración por centros galegos repartidos polo mundo enteiro. A súa música, ademais de nos seus propios traballos, está presente en numerosas colaboracións.

Algúns títulos como "O pirata da Moureira", "Arin-Arin", "Bicho carpinteiro", "Xota de Forcarei" ou "Muñeira do Marreco" están incluídos nol excelente repertorio de exquisito trato do seu disco "Alén do Mar".